ზღვის კენჭები ზღვის სხვადასხვა ფერის კენჭებისაგან აუარებელი სათამაშოსა და სამახსოვრო საჩუქრის გაკეთება შეიძლება. აბა, ამ ნახატს დააკვირდით. ერთი შეხედვით, თითქოს უბრალო, გაურკვეველი ფორმის კენჭია, მაგრამ რას მოგაგონებთ იგი? 
მგონი, ძალიან ჰგავს ავტომობილს. აბა, ნახეთ. 
ავტომობილის ნაწილები შეგიძლიათ ზეთის საღებავებით დახატოთ ან ქაღალდის აპლიკაციებით გამოსახოთ. ყველაზე საინტერესო მინიატურები გრძელი სიპი კენჭებისაგან კეთდება. თქვენ შეგიძლიათ შექმნათ „კენჭების ოჯახი" - დედ-მამა პატარა შვილებით. 
მათ მოსახატად აუცილებლად ზეთის საღებავები იხმარეთ, როდესაც საღებავი კარგად გაშრება, კენჭები უფერული ლაქით დაფარეთ, ისინი ბზინვას დაიწყებენ, თითქოს ეს-ეს არის წყლიდან სველი ამოუღიათო, თანაც ქვა ბუნებრივ ფერს არ დაკარგავს. „კენჭების ოჯახი" ზღვის ბრტყელ ქვაზე დააწებეთ. იცოდეთ, რომ ქვას, ნიჟარას და მსგავს საგნებს კარგად ამაგრებს სპეციალური წებო, რომელსაც სუპერცემენტი ჰქვია. თუ ზღვის კენჭებს მოზაიკისათვის გამოიყენებთ, წინასწარ დაამზადეთ ფონი. კარგი იქნება, თუ მუყაოს სუპერცემენტს წაუსვამთ, ზედ ზღვის წვრილ ქვიშას მოაყრით. როდესაც ქვიშა კარგად დამაგრდება მუყაოზე, ზედ ზღვის კენჭები დაალაგეთ, მიეცით რაიმე ფრინველის, ცხოველის, საგნის ფორმა და ასე დააწებეთ. 
სურათს გაუკეთეთ კედელზე ჩამოსაკიდებელი. თქვენ კიდევ ბევრი რამის გაკეთება შეგიძლიათ. ეს თქვენს ფანტაზიაზეა დამოკიდებული. 
|
